Tarifa social eléctrica

Toles versiones d’esti artículu: [Asturianu] [Castellano]

Ecoloxistes n’Aición enfotaráse en campañes, con asociaciones de vecinos y consumidores pa facilitar l’accesu a la mentada Tarifa Social qu’acaba crease. La mentada tarifa afeutará a ciudadanos, polo xeneral de baxa renta y ye la única que baxará nun contestu xeneral de subíes. Los usuarios potenciales podríen ser alrodiu de 4 millones de cases.

Ecoloxistes n’Aición dirixóse a varies organizaciones de vecinos y de consumidores pa propone-yos facer en comuña una campaña informativa pa facilitar l’accesu a la mentada Tarifa Social d’aquellos ciudadanos que pueden acoyese a ella. La mentada Tarifa creóse hai poco al traviés de la disposición adicional tercera de l’acabante Orde Ministerial que regula les tarifes eléctriques (orde ITC/1857/2008 de 26 de xunu). Nun contestu de xuba xeneralizada de precios eléctricos, la mentada Tarifa Social quier protexer a los sectores sociales de baxa renta y ye la única que va dexar baxar lo que se paga pola electricidá. La tarifa namás podrá aplicase a usuarios que tengan una potencia contratada de menos de 3 kW , lo que significa un usu moderáu de la electricidá, incompatible con usos irracionales y simultáneos de cocines, fornos, calefaiciones o calentadores d’agua eléctricos, usos qu’Ecoloxistes n’Aición siempre denuncien como irracionales, porque, l’usu d’una forma noble d’enerxía, como ye la electricidá, pa producir enerxía degradada a mou de calor significa esperdiciar, polo menos, el 60% de la enerxía. Ye como cortar la mantega con una sierra eléctrica, que se fai con muncha comodidá, pero ye irracional dafechu.

Anque son casi 4 millones de contratos los que, por tener una potencia contratada menor de 3 kW, en principiu podríen acoyese a esta nueva tarifa, Ecoloxistes n’Aición cree que serán munchos menos los usuarios que lo fagan. Pa sacar provechu d’ella amás, la vivienda col mentáu contratu, tien de ser la residencia habitual del usuariu, lo qu’escarta un númberu indetermináu de viviendes, sobre too rurales, que tienen esta potencia.

Ecoloxistes n’Aición indica que’l beneficiariu tipu d’esta nueva tarifa serán persones mayores que viven nos cascos históricos de les ciudaes o nel mundu rural y población inmigrante que vive n’alquiler en viviendes pequeñes y antigües. Pa dalguién que tenga una potencia contratada de 2,5 kW l’aforru, cola nueva tarifa equival a unos 5 euros al mes, nuna facturación total d’unos 25 euros/mes. Na mentada cifra inclúyese, tanto’l términu de potencia, que pasará a valir 0 euros por kW, como l’IVA y l’impuestu especial sobre la electricidá. El mieu que tienen los ecoloxistes ye que, anque’l trámite d’accesu a esta tarifa nun ye mui complicáu (presentar un certificáu d’empadronamientu y unos cenciellos documentos que la compañía eléctrica tien de dar cola primera factura del consumidor) pue ser escesivu pa la población que tien de beneficiase. Ye polo qu’Ecoloxistes n’Aición pide a asociaciones vecinales y de consumidores que collaboren a esparder esta opción y contribuyan a que se fagan contratos que son posibles y beneficiosos pa persones de baxes rentes.




Visites coneutáes: 391