La Comisión Europea entamó un procedimientu d'infraición escontra once Estaos miembros, ente ellos l'Estaáu español, por nun dar nuevos permisos o tener actualizaos los yá fechos pa más de 4.000 instalaciones industriales que tán furrulando en diferentes llugares d'Europa. Los permisos teníen que facese enantes del 30 d'Ochobre de 2007.

Pa Ecoloxistes n'Aición d'Asturies esta situación ye inaceptable, yá que nun pue ser que tean funcionando instalaciones industriales ensin los permisos llegales necesarios p'asegurar que nelles se recorten les emisiones contaminantes; esta valoración compártela Stavros Dimas, Comisariu Européu de Mediu Ambiente.

Les infracciones atopaes afeuten a la Direutiva de la XE relativa a la prevención y al control integraos de la contaminación, que tien l'envis, como diz nel so títulu , de prevenir y controlar les emisiones industriales que contaminan l'aire, les agües y el tarrén. La Direutiva iguaba que tolo más el 30 d'Ochobre de 2007, los Estaos miembros ficieran nuevos permisos –o miraren y, en casu necesariu, renovaren los yá fechos– pa toles instalaciones industriales que tuvieren funcionando dende enantes del 30 d'Ochobre de 1999.

Los datos dados polos propios Estaos miembros ponen de manifiestu qu'once dellos siguen teniendo tovía un altu númberu d'instalaciones industriales a les que nun se-yos ficieron o renovaron los permisos necesarios. Eses instalaciones son más de 4.000 de les aproximadamente 52.000 a les que s'empobina la Directiva en tola Xunión.

A ocho d'esos once Estaos miembros yá se-yos mandó'l pasáu mes de Mayu una primer carta avisándolos. Agora recibirán un segundu avisu per escrito, que ye'l caberu pasu enantes de llevalos ente'l Tribunal de Xusticia de les Comunidaes Europeas. Los ocho Estaos miembros referíos son Bélxica, Bulgaria, Eslovenia, España, Grecia, Italia, Países Baxos y Portugal.

Nel casu español, prorrogóse'l plazu, pa toles empreses que pidieron l'autorización enantes del día 1 de Xineru de 2007, por un tope máximu de seis meses; esti plazu acabó'l 30 de Abril de 2008; con esta prórroga podíen siguir funcionando de manera provisional hasta que se dictase una resolución, siempres que cumpliesen tolos requisitos de caráuter ambiental esixíos pola normativa sectorial aplicable.

Pa Ecoloxistes n'Aición d'Asturies ta nidio que les empreses dañaes, dempués de más de 12 años dende que se publicare de la direutiva, nun ficieron otro qu'apurar los plazos llegales, de mou que fuera imposible adautase a les condiciones impuestes pola llexislación dientro de los plazos afitaos; esta situación, xunta la complicidá de l'alministración, qu'en nengún momentu plantegó cara al chantaxe que-y ficieran acabbó cola amenaza del cierre y de la perda d'emplegu; lo que supunxo la concesión de les mentaes autorizaciones a toles empreses afeutaes, de mou poco rigurosu, y en dellos casos ensin cumplir los procedimientos afitaos.

Esto permitió que siguieren funcionando, pesie a nun facer nin la más pequeña de les midies de control propuestes nos proyeutos. Too esto ye, según Ecoloxistes n'Aición d'Asturies, una incorreuta aplicación de la llexislación, polo que presentó, ente la Comisión de les Comunidaes Europees, la correspondiente Quexa pola mala aplicación de la Direutiva de Prevención y Control Integrados de la Contaminación, quexa que según comunicación de la secretería Xeneral de la Comisión Europes s'unvió a la Direición Xeneral de Mediu Ambiente, pa qu'entame la so tramitación.