PDF - 1.3 MB
El último aliento de la industria del carbón

La posición d'Ecoloxistes n'Aicción, compartida por otres organizaciones ecoloxistes, ye contraria a los proyectos de captura y almacenamientu del dióxidu de carbonu (CO2), pos siguimos pensando qu'aceptar esti tipu d'opciones, de “barrer baxu l'alfombra”, ye aceptar propuestes que namá traten d'esconder los problemes, ensin garantía dalguna de resolvelos, y dexando a xeneraciones futures una hipoteca ambiental más, esperando que sían elles les qu'atopen la solución afecha. Poro, la busca de soluciones que nun sían l'amenorgamientu d'emisiones de gases d'efectu invernaderu nun nos paez n'absolutu afecha y muncho menos presentar esta tecnoloxía como si fora d'usu común y na que tolos problemes tuvieren resueltos, una y bones, magar ye ciertu qu'esisten dellos programes d'investigación, cabo señalar que la CAC entá nun s'aplicó a una central eléctrica de combustibles fósiles de grandes dimensiones.

Y ye que, anque fai enforma que se vienen utilizando técniques pa dixebrar y prindar rutinariamente el CO2, como subproducto de procesos industriales, por que esti gas pueda prindase de les centrales termoeléctricas y otres fontes puntuales, hai de ser prindáu como un gas relativamente puro polo que, nestos momentos, los trés únicos proyectos esistentes pal almacenamientu xeolóxicu a escala industrial, esto ye, de más de 1 Mt de CO2/añu, dos nun tán rellacionaos, con procesos de combustión, sinón cola eliminación del CO2, como impurezas nel gas natural, y unu cola recuperación forzada de petróleu, a partir del CO2 prindáu nuna central de carbón gasificado.

Con estes premises y usando l'actual tecnoloxía, les estimaciones de los costos del secuestru tán na gama de 100 a 300 dólares la tonelada d'emisiones de carbonu evitaes y magar la meta d'esti tipu de programes d'investigación ye amenorgar el costu del secuestru a los 10 dólares por tonelada, falamos d'unos envises a llograr al llargu plazu, en redol al añu 2015. Amás, y según les estimaciones realizaes, la captura del CO2 namá supon les trés cuartes partes del costu total, al qu'hai de añedir l'almacenamientu, tresporte y sistema de secuestru. Tou esto supon un consumu enerxéticu adicional importante, qu'implica mayores emisiones de CO2 y, según estremaos análisis realizaos, una medría nel costu de xeneración d'eletricidá que supon, nestos momentos, doblar dichu costu de xeneración.

Atopamos, poro, bien llueñe de que les técniques y práctiques de secuestru de carbonu cumplan los requisitos que se-y esixen, una y bones, amás de demostrar que tienen abonda capacidá d'almacenamientu, han de demostrar que son estables al llargu plazu y que van ser económicamente vidables, nunos momentos, no que nin siquier demostraron que son medioambientalmente aceptables.

Quixéramos denunciar a lo último, la estáfa que supon la instalación de nueves centrales térmiques de carbón que se faen llamar “llistes pa prindar”, lo que suxure que les centrales van modernizase. Naide sabe cuándo va pasar eso, si ye que pasa. El factor clave pa la CAC ye si les opciones comerciales de captura van tar disponibles pa les centrales de carbón y a qué costu. Lo más cenciello pa evitar l'abusu del términu “llista pa prindar” y con independencia de la posición sobro l'aplicación de la tecnoloxía de captura de carbonu, sería dicir non a toles centrales térmiques de carbón, ENSIN un sistema real y funcional de CAC.