Con una nota de prensa, unviada a los medios de comunicación, el Consorciu pa la Xestión de los Residuos Sólidos d'Asturies, da un pasu más nel alderique sobro la instalación d'una llanta incineradora na nuesa Comunidá, y lo primero que pide, como suel ser habitual nestos casos, ye que los colectivos contrarios a la incineración dexen de provocar alarma social, y failo xusto'l mesmu día en que, la so Comisión delegada, por mayoría minoritaria, propón a la so Xunta de Gobiernu empecipiar los trámites medioambientales y de contratación pa la so puesta en marcha, utilizando, pa evitar qu'el endeudamiento; que, de toes formes vamos pagar los asturianos y asturianes; consolídese nos conceyos, a la so sociedá instrumental, Cogersa S.A

Con respectu al conteníu de la nota hemos d'estimar dos coses, en primer llugar que, les previsiones plantegaes pal 2015, nun se dixebren enforma de les que, dende'l Consorciu Cívicu, nos plantegamos pa esi mesmu periodu, polo que, la nuesa propuesta, tachada dende dellos sectores como utópica, nun lo ye n'absolutu. Amás, y como venimos denunciáu recuéyese claramente la necesidá de realizar dos nuevos arramaos, per una parte, y mayoritariu, de escorias, las cuales, magar ye ciertu que, legalmente, podríen reutilizase, la realidá ye que, n'Asturies, coles escorias de fornu altu, acería y centrales térmiques, yá se superen los trés millones de tonelaes añales, lo qu'apocayá probable l'absorber otres 135.000 tonelaes añales más, polo que, como recueye la nota de prensa, el so destín va ser el vertideru de residuos inertes que Cogersa esplota dende 2003 nel valle de La Escura. A esto hai qu'añedir un nuevu arramáu, nesti casu de residuos peligrosos, el de les cenices llograes tres la combustión de los residuos sólides urbanos, y que van haber de dir al vertideru de seguridá.

Con al respective de otros aspeutos, como'l de les emisiones de dioxinas, la so peligrosidad ta fora de toa dulda, especialmente polos sos efectos d'alteración del sistema hormonal, ye ciertu que, efectivamente, los sos principales efectos sobro la salú nun van venir poles sos presencia na atmósfera, una y bones, nun 90%, va entrar nel nuesu cuerpu pola alimentación; dáu'l so calter acumulativu y l'efectu amplificador que sobro elles exerz la cadena alimentaria; ye por eso polo que llama l'atención la referencia a la so presencia n'otres actividaes cotidianes, como la combustión d'un pitu o'l cocináu en barbacoa; y otres como les quemes forestales o la quema de rastrojos, lo cual ye ciertu, pero ye que, acasu cola incineradora va prohibise fumar y les barbacoes, o seique la quema de rastrojos, evidentemente non, lo que va asoceder ye que les nueves emisiones van sumase a les esistentes, especialmente a les que Cogersa nun s'atreve a nomar, una y bones tolos inventarios d'emisiones indiquen que, amás de les incineradores, son fontes importantes d'emisión la industria del cinc y del aluminiu, la fundición d'aceru y les plantes de sinter, y como non, les centrales térmiques de carbón, pero esta situación nun mengua los problemes de salú xeneraos pola incineración, lo que si fai ye bien difícil estudiar el so efectos futuros, dada la enorme contaminación de fondu esistente.

Tamién fai una referencia a les emisiones añales de CO2, que efectivamente pue que sían daqué inferiores a les plantegaes, especialmente si tenemos en cuenta los rexistros d'emisiones, que nos dan daqué mas de 0,8 t de CO2, por tonelada de residuo tratáu, pero dicir que les emisiones van ser de 159.000 tonelaes al añu de CO2, ye a cencielles un camuflaje que fai de cutiu la industria de la incineración, gracies a la esclusión del carbón biogénico de les estadístiques de les emisiones y que, acordies con datos de la mesma industria incineradora, representa un 60% del carbonu que se puede atopar nes basures. Asina, ente que, mientres años, incineradores como la de Mataró, o Sant Adria, declaraben del orde de 400.000 t/añu, pasaron, a partir del 2004, a declarar menos de 200.000 y ye que magar ye ciertu que les emisiones de CO2 provenientes de la combustión de la biomasa (papel, comida, restos verdes y madera) son emisiones biogénicas y nun tienen d'incluyir se nel total d'estimación d'emisiones, el Panel Intergubernamental d'Espertos sobro'l Cambéu Climáticu menta explícitamente que cuando se comparen fontes d'enerxía, el carbonu biogénico tien que ser incluyíu. Esto ye por cuenta de que tou'l CO2 emitíu por una incineradora va tener el mesmu efectu sobro la atmosfera independientemente del so aniciu.

Lo mesmo puede dicise de la xeneración eléctrica nesti tipu de plantes, qu'utilicen un trucu pa manipoliar la ineficiencia de les incineradores y que consiste en multiplicar la eletricidá por un factor 2,6; lo que fai qu'el so “formula d'eficiencia” enerxética nun sía nada mas qu'una fórmula política pa reclasificar la incineración como recuperación d'enerxía; clara manipulación con oxetivu de marketing pos reclasificar una planta con eficiencia enerxética baxa seria malo de vender al públicu.

Pero más allá d'estos detalles, lo que ta claro ye que nun mundu con una creciente presión sobro los recursos, con una crisis ecolóxica que rique amenorgar emisiones y una crisis financiera que va perxudicar la financiación de proyectos faraónicos d'eliminación de basurres, ye muncho más sensatu apostar por una estratexa basada na creación d'empléu, la recoyida selectiva, altos niveles de reutilización y reciclaje y un apueste pol diseñu de productos qu'a la fin de la so vida útil puedan ser fácilmente separaos, reutilizaos y/o reciclaos.

El problema que se nos plantega nun ye técnicu, sinón políticu y amás tenemos exemplu d'ésitu como'l de la rexón de Flandes, en Bélxica, que sufrió una aguda contaminación poles dioxinas de les incineradores, lo que condicionó la planificación de les polítiques de resiudos y anguaño recicla y composta un 75% de les sos basures y incinera un 20%, pero más interesante inda, consiguió romper la correlación ente medría económica y xeneración de residuos y consiguió amenorgar la parte residual de 550 kg en 1996 a menos de 150 kg por habitante en 2006. Nel mesmu periodu de tiempu, Dinamarca, el país que porcentualmente más incinera n'Europa, aumentó la so tasa de xeneración de resiudos hasta'l récord européu de 801 kg por habitante, cuando la media europea ye de 522.