Tantu Ecoloxistes n'Aición d'Asturies, como muncho otros grupos ambientales asturianos [1], consideramos que los actuales datos del censu del urogallo n'Asturies, amuesen el total fracasu de la política del Principáu con esta especie, al tener un alarmante descensu en gran parte d'Asturies, que la da casi por sumida na zona Centro-Oriental (Somiedu, Teberga, Quirós, L.lena, Ayer, Casu, Ponga, Amieva) d'alcuerdu al actual censu.

Pasóse d'un númberu envaloráu de machos na zona Centro-Oriental d'Asturies de 339, nel censu de 1983, a 50 machos, con un amenorgamientu considerable nel censu del 2000/2001, y a la situación actual, que, col censu casi rematáu na zona centro-oriental, pasemos a 3 machos vistos y otros 2 posibles, lo que supon un amenorgamientu de mas del 90%.

Ta claro que'l Principáu llevó a cabu una política de xestión contraria a la que suxuren les conocencies disponibles, facilitando o dexando l'apertura de pistes y construcción de carreteres, la minería a cielu abiertu, róceslos, aclareos y baltes, la repoblación con especies foranes y les quemes. Paralelamente, destináronse ingentes cantidá de dineru a la construcción d'un centru de cría en cautividá y d'otru d'interpretación que; como puede comprobase, nun sirvió pa nada; mientres se ponen torgues al desenvolvimientu de proyectos d'investigación.

Anque l'alministración ye la responsable postrera de la situación del urogallo, y el so papel al respective deberíase centrar en llevar a cabu la xestión más afecha posible, pa correxir esa situación de cayente, lo qu'esta claro qu'el so papel demostróse poco efectivu y, ello ye que la xestión que tán desenvolviendo ye más bien la opuesta a la que debiera, amás sigue ensin redactase'l Plan de Recuperación del Urogallo qu'esixe la llei.

A pesar de los cambeos normativu del so estatus, primero incluyéndola nel Catálogu Rexonal d'Especies Amenaciaes de la Fauna Vertebrada del Principáu d'Asturies como especie sensible a l'alteración del so hábitat, y darréu, n'ochobre de 200,5 pasando a tar incluyida como especie en peligru d'estinción, dáu l'agravamientu del so delicáu estatus poblacional, resulta evidente que la finalidá del plan de caltenimientu, que yera, de forma prioritaria, detener el cayente poblacional que ta sufriendo la especie, foi un fracasu una y bones nun se cumplieron los oxetivos marcaos pol:

- Recolonización d'árees abandonaes y evitar que siga'l procesu de fragmentación y deterioru d'estáu de caltenimientu de la especie.
- La eliminación progresiva de les amenaces pente medies de una meyora de la xestión del hábitat.
- La busca de fórmules que compatibilicen los intereses de diversos sectores granibles colos requerimientos ecolóxicos de la especie.

Dende Ecoloxistes n'Aición d'Asturies, creemos que tamos ante unos fechos bien graves, que tienen delles causes, que precisen d'una llectura crítica de la xestión de la especie que fixo'l Principáu d'Asturies y que ye precisu da-y un xiru, que tenga en cuenta la combinación de les mesmes, y que ente otres son:

- L'amenorgamientu y fragmentación del so hábitat.

Ye quiciabes lo mas evidente que se dio n'Asturies cola tolerancia del Principáu, que dexó'l desenvolvimientu d'actividaes bien agresives cola redolada que provocaron esti amenorgamientu, los cientos de pistes abiertes que dexen el transito de toa clase de vehículos y les molesties que xeneren, les mines y canteres (ampliación de Degaña), les estaciones d'esquí (impactu de Fontes d'Iviernu), etc..

- Les quemes forestales.

Asturies ye la segunda rexón en númberu de quemes y de superficie quemada d'España a pesar de ser de les comunidaes más pequeñes de territoriu. Non s'esta produciendo l'acotadura de la totalidá de les zones quemaes como ye obligatoriu. Non s'esta faciendo tol esfuerzu na prevención.

- El furtivismo.

Ye un practica qu'inda se sigue produciendo de manera esmolecedora, faciendo'l censu detuviéronse a 2 furtivos en L.lena al pie d'un cantadoriu, y en Teberga afayó un garduña de gran tamañu peligrosu hasta para les persones.

- La competencia pol alimentu con otres especies.

Per un sitiu, la competencia pol alimentu colos ungulaos domésticos y monteses, tollo agraváu pola sobrecarga ganadera esistente en gran parte del nuesu territoriu y pola sobrepoblación d'ungulaos monteses motivada pola eliminación sistemática de los sos enemigos naturales como'l llobu qu'hai que recordar esta escorríu.

Por tollo ye precisu un plan de futuru real consensuáu con toos, non podemos quedar n'iniciatives pa la galería mientres vemos como la especie sume pa siempres de los nuesos montes.

Notas

[1] Coordinadora Ecoloxista d'Asturies, Coordinadora Ornitoloxica d'Asturies, Asociación pa la Defensa Xurídica del Mediu Ambiente “Ulex”, Grupu de Recuperación y Estudiu d'Espacios Naturales “Green”, Ereba, Ecoloxía y Patrimoniu, Ecoloxistes n'Aición d'Asturies, Grupo Asturies de WWF España, Grupu Ecoloxista'l, Carbayu de Valdés, Asociación Eco Ástures, Plataforma pa la Defensa del Cordal Cantábricu, Asociación Asturiana d'Amigos de la Naturaleza “Ana”, Colectivu Ecoloxista d'Avilés