Personense nos espedientes d’esplotación de gas

Toles versiones d’esti artículu: [Asturianu] [Castellano]

Ecoloxistes n’Aición d’Asturies dirixióse a la Conseyería d’Economía y Empléu, del Principáu d’Asturies, solicitando personase nos espedientes d’investigación y esplotación d’hidrocarburos que se tean tramitando na Comunidá, especialmente los referíos a la estracción de gas non convencional, per mediu de la esplotación de metanu proveniente de les capes y mines de carbón, utilizando técniques de fractura hidráulica, conocida como “fracking”. Nel escritu pidióse, amás, la documentación de dichos espedientes.

En Asturies (según la Web del Ministeriu d’Industria y les publicaciones nel BOPA) atópense empecipiaos los siguientes permisos:

- Granda, con una superficie de aproximadamente 18.657 hectárees, nos conceyos de Xixón, Siero, Carreño, Noreña, Sariegu y Villaviciosa a favor de les sociedaes “Petroleum Oil & Gas España, S.A.” (50%), “Hunosa” (40%) y “Vancast Esploración, S.L.” (10%)

- Villaviciosa, con una superficie 3.533 hectárees, nos conceyos de Cabranes, Colunga, Xixón, Nava, Parres, Piloña, Sariegu y Villaviciosa. Concedíu a Petroleum Oil & Gas España, S.A. - 70% HUNOSA - 20% Vancast Esploración, S.L. - 10%

- Llieres, con una superficie de 12.510 hectárees, concedíu a Hidrocarburos del Cantábricu, S.L. pa llevar a cabo investigación d’esplotación de metanu proveniente de les capes y mines de carbón, nos conceyos, de Siero, Bimenes, Sariegu, Nava, Llangréu y Villaviciosa.

- Mieres, con una superficie de 37.482 hectárees, concedíu a Heritage Petroleum, Plc. pa llevar a cabo investigación d’esplotación de metanu proveniente de les capes y mines de carbón, nos conceyos d’Uviéu, Siero, Bimenes, La Ribera, Llangreu, Samartín del Rei Aurelio, Mieres, L.lena, Ayeri y Llaviana.

- Morcín-1, con una superficie de 12.539 hectárees, concedíu a HUNOSA pa llevar a cabo investigación d’esplotación de metanu proveniente de les capes y mines de carbón, nos conceyos d’Uviéu, La Ribera, Quirós, Morcín, Mieres, Riosa y L.lena.

- Llaviana, con una superficie de 12.552 Hai, concedíu a HUNOSA pa llevar a cabo investigación d’esplotación de metanu proveniente de les capes y mines de carbón, nos conceyos de Bimenes, Nava, Samartín del Rei Aurelio, Llaviana, Ayeri y Sobrescobiu.

- Campumanes, con una superficie de 12.563 Hai, concedíu a Hidrocarburos del Cantábricu, S.L. por pa llevar a cabo investigación d’esplotación de metanu proveniente de les capes y mines de carbón, nos conceyos d’Ayeri y L.lena.

La fracturación hidráulica (fracking) produció severos impactos ambientales y sociales nos países en que s’aplicó, como los Estaos Xuníos, hasta’l puntu de qu’en Francia se prohibió’l so empléu.

El fracking trai graves riesgos sobre’l mediu ambiente, les persones y les reserves d’agua duce:

  • Contaminación d’acuíferos y ríos polos productos tóxicos presentes nel amiestu de líquidos inyectaos al sosuelu.
  • Ingente consumu d’agua que, namá en parte, recupérase fuertemente contaminada.
  • Alta ocupación del territoriu pola cantidá de pozos necesarios pa optimizar les esplotaciones, incidiendo negativamente n’actividaes tales como l’agricultura, la ganadería y el turismu.
  • Fugues de gases contaminantes y de metanu (gas d’efectu invernaderu muncho más potente qu’el CO2).

Ecoloxistes n’Aición d’Asturies entiende que’l Principiu de Precuru debe de tar más presente que nunca nes decisiones relatives a la estracción de recursos ya impactu ambiental nel territoriu. Los riesgos del usu de quebrar hidráulica son elevaos -como lo demuestra la esperiencia en EE UU- y el so rendimientu enerxéticu baxu. Por tou ello les autoridaes asturianes tendríen de prohibir la investigación y esplotación de gas non convencional por quebra hidráulica nel nuesu territoriu y apostar por un modelu enerxéticu basáu nel aforru, la eficiencia y les enerxíes anovables; y asina se solicitó, el pasáu mes de xineru, al Presidente de la Comunidá Autónoma.