Pa la organización ecoloxista sospriende que s'empecipiara esta tramitación; qu'afecta a casi 300.000 hectárees; de l'Asturies Central, a pesar de que nin el Bancu Européu d'Inversiones, nin l'Estáu español hayan emprestáu sofitu financieru a nengún proyectu español de CAC, según consta nel Resolvimientu de 9 de mayu de 2011 de la Secretaria d'Estáu de Cambéu Climáticu.

A les torgues económiques xúnense los ambientales. Según Ecoloxistes n'Aición la busca de soluciones que nun sían l'amenorgamientu d'emisiones de gases d'efectu invernaderu nun ye n'absolutu fayadiza y muncho menos presentar esta tecnoloxía como si fora d'usu común y na que tolos problemes tuvieren resueltos.

Ecoloxistes n'Aición ye contraria a los proyectos de captura y almacenamientu de carbonu yá que aceptar esti tipu d'opciones, de «barrer so l'alfombra», ye tratar d'esconder los problemes, ensin garantía dalguna de resolvelos, y dexando a xeneraciones futures una hipoteca ambiental más, esperando que sían elles les qu'atopen la solución fayadiza.

Amás, refuga la concesión de los permisos solicitaos por:
- La posibilidá de qu'esta técnica produza cambeos estructurales nes formaciones xeolóxiques que podríen traer una actividá sísmica con ciertu impactu na superficie, tou ello dependiendo de la opción y de los llugares escoyíos.
- L'impactu sobre la salú y la seguridá humanes, que ta dictáu por factores como si la emisión de CO2 ye alcontrada o esvalixada y por si l'índiz d'emisión ye catastróficu o crónicu. Independientemente del índiz d'emisión, esiste un altu riesgu pa la salú y seguridá humana si'l CO2 aumenta nes zones poblaes, habitaes, o otru tipu d'espacios zarraos o buecos naturales na superficie.
- La disolución de CO2 n'agües fondes alteria'l pH del fluyíu, lo que provoca cambeos na xeoquímica, calidá de l'agua, y d'últimes na salú del ecosistema. La movilización de metales (tóxicos), sulfatos, cloruros y de la contaminación puede llegar a niveles peligrosos faciendo imposible l'usu humanu y para riego de l'agua soterraño.
- La capacidá real pa exercer un control sobre'l gas, yá que inclusive col desenvolvimientu d'una tecnoloxía altamente avanzada pa estudiar les formaciones xeolóxiques per mediu de métodos sísmicos, podríen nun detectase l'escape de pequenes cantidaes de CO2, sobremanera cuando estos tienen llugar llueñe del puntu d'inyección.

Por tou ello, Ecoloxistes n'Aición entiende que la tramitación del proyectu, nestos momentos, ye contraria a toa lóxica, ambiental, y económica, polo que pide l'abandonu del mesmu, y que se sometan los permisos d'investigación al procedimientu d'Evaluación d'Impactu Ambiental, considerando amás, pa evitar el fraccionamiento de los proyectos, tal que yá reconoció la xurisprudencia n'otres ocasiones, el qu'estos proyectos de CAC pudieren ser complementarios de los permisos de busca d'hidrocarburos, colos que comparten territoriu.