L'alcuerdu firmáu ente HUNOSA y Endesa p'asitiar en La Perea una central nueva de gas, de 400 MW, funcionando en ciclu combináu, supón, amás d'un importante incrementu nos niveles de contaminación; nuna zona onde estos valores yá son importantes; una oportunidá pa discutir sobre los proyectos, de tipu mediuambiental, que se presenten como un gran avance, cuando en realidá puen suponer un nuevu «pautu Faustianu» ello ye, un pautu col diañu, onde se nos ufierten fáciles soluciones tecnolóxiques a los problemes existentes, a condición de caltener la vixilancia a lo llargo de xeneraciones, y con un «contratu» que, polo menos, deberíemos conocer.

En primer llugar, llama l'atención que, dempués de cerca de venti años de l'aprobación de la directiva sobre grandes instalaciones de combustión; y ensin que nenguna de les centrales térmiques de carbón asturianes aplicare les técniques que se cuenta con investigar agora, y cuando nengún de los grupos térmicos existentes optó por adaptase a la versión nueva de la directiva; que-yos permitiría funcionar ensin llimitaciones; o cuando les centrales térmiques españoles; a diferencia de les britániques, belgues, o alemanes, nun informen de les sos emisiones de mercuriu, incumpliendo claramente les directrices del Rexistru d'Emisiones y Fontes Contaminantes; nos presenten estes investigaciones como daqué nuevo, cuando en realidá, son yá dos décades les que llevamos perdíes, colo qu'esto supón en dañu al mediu ambiente y mui especialmente a la nuestra salú.

Pero ye nel alcuerdu sobre captura, tresporte y almacenamientu de CO2 (CAC), onde tenemos que tar más sollertes, en cuantes que cada vegada más espertos atalanten que pue ser un nuevu «pautu Faustianu». Pautu que fai referencia a la lleenda, que surdiere n'Alemaña na Edá Media; y dempués espeyada y inmortalizada por Goethe na so novela; que nos describe a Dios y Mefistófeles aporfiando nun apueste, sobre la posibilidá de que Lucifer separte del bon camín al Doctor Fausto, qu'acepta da-y l'alma al Diañu a cambiu de recibir los más intensos placieres de la vida. Dende aquel momentu, dizse que pesllar un Pautu Faustianu ye cuando s'acepta un conveniu, cediendo a tentaciones, pero persabiendo de que pue tener arreyaes consecuencies fatales, y utilizóse pa caracterizar munches «soluciones tecnolóxiques» que, con iguar problemes inmediatos teníen efectos potenciales negativos a llargu plazu.

Esti ye'l casu de la CAC, estratexa tecnolóxica que promete poder siguir utilizando los combustibles fósiles, ensin qu'esto suponga una xuba de la concentración de CO2 n'atmósfera, y polo tanto, ensin efectu sobre'l clima. La CAC reconoz la importancia que tienen los combustibles fósiles pa la sociedá y que la producción de CO2 ye un fechu venceyáu a la so combustión. Pero la CAC suxer que'lCO2 que vien d'esa combustión nun ha descargase, necesariamente, a l'atmósfera, en cuantes que pue captase nos mesmos puntos onde se xenera; centrales térmiques y otres grandes fontes d'emisión; y posalu dempués lloñe de l'atmósfera, como na biosfera, nos océanos, o n'almacenamientos xeolóxicos, casu de depósitos

De va dellos años p'acá, esta tecnoloxía apaeció como la solución más barata pal calentamientu global. L'enfotu con que se recibió recuerda al optimismu qu'acompañó a la introducción de la enerxía nuclear na xeneración eléctrica, y tienen en común un aspectu importante, la xeneración de residuos qu'han xestionase a lo llargo de munchu tiempu.

Cierto ye que'l CO2 nun ye un residuu peligrosu, nel mesmu sentíu que sí lo son los residuos nucleares, en cuantes que constitúi un componente normal de l'atmósfera, y de la respiración humano, pero la so xestión ye precisa pa prevenir concentraciones n'atmósfera terrestre que supongan un cambiu climáticu.

Queda claro, polo tanto, que los dos elementos del pautu de Fausto tán presentes; la tentación de lo fácil, enerxía ensin problemes pa siempre, y, a cambiu d'ello, la obligación de curiar polos residuos a lo llargo de munchu tiempu, pudiendo vese, nesta solución tecnolóxica'l puntu de vista del diañu; esperando que Fausto caiga na tentación; y el de Faustu; sabiendo que nunca va poder dexar de tar vixilante. La tentación qu'apurre la CAC ye la estensión de los combustibles fósiles unos pocos cientos d'años, llendando les emisiones de CO2 a l'atmÓsfera, pero espurriendo'l tiempu d'emisión, aselando'l problema per un tiempu pero faciendo a la humanidá más dependiente de los combustibles fósiles y con un contratu que suel tapecer los términos que vienen darréu:

- La CAC precisa de considerables cantidaes d'enerxía, hasta un 40% más, pa captar y almacenar el CO2 producíu, lo que fai que, de mano, s'incrementen les emisiones y que los combustibles fósiles escosen más rápìdo.

- Los costes de xeneración tienen una xuba d'ente un 40% y un 85%, nel casu d'una central de carbón pulverizao hipercrítica, esto supón, casu de nun actualizase les tarifes, una xuba importante, del orde de 1.000 Millones d'euros al añu, nel déficit de tarifes.

- Nel casu d'almacenamientu en vetes de carbón, amás de qu'han tenese en cuenta los problemes na vixilancia a llargu plazu, pa evitar fugues, estes han reconocese como «inesplotables», ello ye, inutilizaes pa siempre, y asina evitar que'l CO2 presu nelles torne a l'atmósfera.

Y lo que ye más importante, Investigar en CAC, cola promesa d'una tecnoloxía que puea resolver el problema, pue suponer el retrasu na toma d'otres midíes más duraderes, disviando recursos de la investigación n'incrementar la eficiencia enerxética o na investigación en fontes enerxétiques renovables.