A Ecoloxistes n'Aición d'Asturies abúlta-yos que l'AVE nun ye lo más afayadizo pa la rasa costera cantábrica

El cordal cantábricu tien una rede ferroviaria dafechu desfasada, afayadiza pa los viaxes curtios, pero non pa los trayeutos de llargu percorríu. Güei nengún viaxeru usa los servicios de FEVE pa dir d'un cabu a otru de la nuestra comunidá autónoma, o pa movese per Galicia, Cantabria o Euskadi. Hai de tratar esi problema y, poro, dende'l movimientu ecoloxista siempre defendimos la modernización de la rede ferroviaria qu'atraviesa les cuatro comunidaes autónomes cantábriques. Pero pa nós esa modernización necesaria y deseable nun ye l'AVE, sinón otru tipu de trenes de menor costu pa les arques públiques, el viaxeru y el mediu ambiente.

Dende Ecoloxistes n'Aición d'Asturies, entendemos que, frente a un AVE que consume munchu territoriu y enerxía, qu'arrecostina un gastu pergrande pa les arques públiques, y del que van sacar provechu, sobre too, los viaxeros con perres, proponemos un tren públicu de calidá, pensáu pa tou tipu de viaxeros y pal tresporte de mercancíes, que nun consuma tanta enerxía como'l d'alta velocidá, nin dexe una marca de fierro atravesando'l territoriu asturianu.

Un tren de prestaciones como'l TALGO y los INTERCITY, un tren sostenible ecolóxicamente, un braeru serviciu públicu, y un tresporte afayadizu pa toos qu'axunte'l territoriu. Esi ye'l tren que creemos que realmente necesita Asturies.

Poro, aplaudimos la decisión de la Federación Socialista Asturiana de “dar carpetazu” al AVE asturianu, anque nos paeza ilóxico que mentanto equí'l PSOE refuga l'Alta Velocidá, n'otros sitios d'España, y dende l'alministración central, afale'l so usu.

Abandonáu l'AVE, tenemos de ponenos agora a trabayar a la busca d'esi otru tren posible, porque tamos convencíos de qu'escontra'l cambiu climáticu, un tren públicu, de calidá, social y ecolóxicamente sostenible va ser el tresporte del sieglu XXI.