Ecoloxistes n’Aición caltién que la Cume del Clima de Bali tien d’establecer unes bases ambicioses na llucha escontra’l cambiu climáticu a partir del 2012.
Kioto foi un pasu pequeñu, pero ye perimportante y urxente fraguar midíes de mayor caláu pa evitar un cambiu climáticu catastróficu.

La humanidá tien diez años pa construir un nuevu futuru. Esi ye’l plazu que dan los científicos pa evitar que la concentración de Gases d’Efeutu Invernaderu na atmósfera entame a baxar. De nun ser asina, la temperatura media del planeta subirá más de 2ºC penriba de los niveles preindustriales, y los efeutos del cambiu climáticu van ser muncho peores.

Pa Ecoloxistes n’Aición ye necesario baxar les emisiones un 40% pal añu 2020 y un 85% pa la metada del sieglu (respeutu a 1990), per parte de los países más industrializaos, p’algamar asina l’oxetivu conseñáu.

Estos países (ente los que ta España) son los responsables históricos del problema, tanto poles emisiones que ficieron como pola creación del modelu de desarrollu que nos empobinó a él.

Poro, el yá famosu Mandáu de Bali tien de tener un repartu de responsabilidaes diferenciáu y xustu, con un nuevu mecanismu de funcionamientu que garantice una distribución igualitaria de les emisiones por habitante y el necesariu desarrollu de los países probes. Nun se pue escaecer que, demientres qu’un ciudadanu européu emite 10,5 tonelaes de CO2 cada añu, un chinu emite 4 tonelaes al añu (por nun falar de les 20 tonelaes d’un norteamericanu).

Resumiendo: fai falta poner llendes obligatories a les emisiones nos países más industrializaos, alcuerdos voluntarios d’emisiones pa los países que tán xorreciendo, espardimientu de la llucha pa evitar la deforestación, y evolución hacia una teunoloxía llimpia a baxu costu, asina como ayudes p’adautase a los efectos del cambiu climáticu pa los países más probes.