• La plataforma “Un futuru ensin carbón”, integrada poles principales organizaciones medioambientales d’España, forma parte de l’alianza europea «Europe Beyond Coal», que tien como oxetivu’l fin del carbón n’Europa y publica güei l’informe “Last Gasp: the coal companies making Europe sick”. Últimu aliendu: les empreses del carbón enferman a Europa.
  • Piden al gobiernu que nun s’otorguen más subvenciones al carbón y qu’estableza l’añu 2025 como llende pa que sigan abiertes les térmiques de carbón n’España, y a les eléctriques que dexen d’invertir nes sos centrales de carbón y soliciten los zarros de forma oficial cuanto antes pa garantizar que sían ordenaos y planiaos.

La plataforma “Un futuru ensin carbón” 1 La plataforma “Un futuru ensin carbón” llanza n’España l’informe européu «Last Gasp: The coal companies making Europe sick» (“Últimu aliendu: Les compañíes del carbón que tán enfermando a Europa”) 2. Esti informe, impulsáu pola alianza europea Europe Beyond Coal, sorraya’l costu ocultu del usu de carbón pa la producción d’eletricidá, utilizando modelos de datos 3 que tienen en cuenta les emisiones de les centrales y la meteoroloxía pa estudiar los sos impactos na calidá del aire y la salú de la población.

Les resultancies amuesen la elevada responsabilidá que tienen les principales compañíes d’enerxía europees qu’utilicen carbón pa producir enerxía. Les emisiones de gases y partícules procedentes de les sos centrales traen costos inasumibles pa persones de toa Europa, provocando graves problemes de salú y miles de millones d’euros en costos ocultos, según el modelu detalláu. En concretu, el costu de les enerxíes más contaminantes, que ta siendo asumíu pola sociedá civil, ye d’hasta 22.000 millones d’euros. Amás, les 91 centrales de carbón qu’operen anguaño n’Europa son responsables de 7.600 muertes prematures, 3.320 nuevos casos de bronquitis crónica, y más de 137.000 casos con síntomes d’asma en neños 4.

Diez empreses concentren la responsabilidá de dos tercios de los impactos na salú de la producción d’eletricidá a partir del carbón n’Europa según los datos de 2016 analizaos. Les dos empreses más contaminantes son RWE y EPH, dambes d’Alemaña. Quemen una elevada cantidá de carbón, en concretu lignitu, la variedá más contaminante, y les quemen en rexones bien poblaes. N’España, la compañía más contaminante ye Endesa, que cunta con 6 de les 16 centrales qu’operen anguaño nel nuesu país (cuntando cola so participación na térmica de Anllares). La compañía yá realizó inversiones p’afaer les sos centrales d’As Pontes (A Coruña) y Litoral (Almería) a les llendes marcaes pola normativa europea, colo que pretenden teneles abiertes siquier unos años más, daqué incompatible cola llucha contra’l cambéu climáticu y que supon un problema de salú pública.

Los costos sanitarios calculaos a nivel européu deriven de los 5.800 ingresos hospitalarios y más de dos millones de díes de trabayu perdíos atribuyibles a la contaminación por centrales de carbón. Estos costos son equivalentes o superiores a los ingresos que llogren pola vienta de la so eletricidá producía con este combustible. Por casu, a la compañía alemana RWE 5 atribúyense-y alredor de 48 euros de costos sanitarios por MWh xeneráu a partir del carbón, en comparanza col preciu de la eletricidá al per mayor d’alredor de 50 euros/MWh n’Alemaña.

Esti informe dexa bien clara la responsabilidá de les empreses pola contaminación atmosférica. Por ello, dende la plataforma ecoloxista europea se alvierte de la necesaria urxencia de les midíes y piden que les compañíes soliciten el zarru de les centrales, nun pidan nin les concedan subvenciones o ayudes públiques, y dexen d’invertir n’adaptaciones p’allargar la so vida de forma artificial. Otramiente, ye necesariu resaltar el deber de les persones encargaes de les polítiques l’esixi-yos responsabilidaes. Ye necesariu poner fin a los esfuerzos pa enllargar la vida de les centrales térmiques, nun conceder  más subvenciones, y comprometese de forma inmediata al abandonu del carbón nel añu 2025 como fecha llende asegurando una transición ambiciosa y xusta pa les persones y el mediu ambiente.

«Les empreses conocen perbién los problemes de salú de los que son responsables. Pero, como amuesa esti informe, l’impactu de la so contaminación ye muncho más ampliu y grave de lo que se suel pensar. Europa ye una rexón densamente poblada, y una central de carbón en cualquier país amenacia la salú de la población de toa Europa por cuenta de la contaminación transfronteriza», afirma Kathrin Gutmann, Directora de Campaña de l’alianza europea Europe Beyond Coal. «El zarru de les centrales de carbón va ameyorar la salú d’un eleváu númberu de persones, amás de contribuyir a la llucha contra’l cambéu climáticu.»

Dende la Plataforma española añeden: “Pidimos al gobiernu que nun s’otorguen más subvenciones al carbón y qu’estableza l’añu 2025 como llende por que sigan abiertes les térmiques de carbón n’España, y a les eléctriques que dexen d’invertir nes sos centrales de carbón y soliciten los zarros de forma oficial cuanto antes pa garantizar que sían ordenaos y planiaos. Anguaño esiste una grave crisis de contaminación atmosférica, y el so impactu na salú humana pide midíes con urxencia.”

  1. Europe Beyond Coal ye una alianza d’organizaciones y grupos de la sociedá civil que trabayen pa catalizar los zarros de les centrales nucleares, mines de carbón y centrales eléctriques, pa evitar el desenvolvimientu de nuevos proyectos de carbón y acelerar la transición xusta escontra un escenariu d’enerxíes renovables y eficiencia enerxética. Dende va dellos años, una campaña hermana liderada por Sierra Club n’Estaos Xuníos llevó al zarru a 262 centrales térmiques de carbón, más de la metá de les centrales esistentes n’EEXX. Estos zarros siguen magar l’axenda pro-carbón de l’Alministración Trump. La plataforma foi llanzada tamién a nivel nacional n’España sol nome «Europa: un futuru ensin carbón», impulsada poles principales organizaciones medioambientales d’España y una ventena de colectivos ecoloxistes locales: Amigos de la Tierra, Ecoloxistes n’Acción, Fundación Anovables, Greenpeace, IIDMA, Plataforma por un nuevu modelu enerxéticu, SEO/BirdLife, y WWF, ente otres. Esta plataforma busca acelerar l’abandonu progresivu del carbón y la transición escontra un modelu basáu n’enerxíes anovables. La plataforma española llanzó una campaña d’acciones, que pueden consultase na so nueva páxina web, por cuenta del Cume de Cambéu Climáticu de Polonia (COP24). van llevar a cabo actividad de comunicación y el 1 d’avientu desenvolveránse acciones específiques contra’l carbón en tol estáu.
  2. “Last Gasp: The coal companies making Europe sick” ye un informe publicáu por Climate Action Network Europe (CAN Europe) y foi ellaboráu ya impulsáu por Europe Beyond Coal, Sandbag, Greenpeace Europa Central y Oriental y European Environmental Bureau. Puede atopar l’informe completu equí: beyond-coal.eu/last-gasp
  3. La metodoloxía d’impactu na salú utilizada nel informe se basa nos encamientos del proxecto «Riesgos de salú de la contaminación del aire n’Europa» (HRAPIE) de la Organización Mundial de la Salú n’Europa sobro evaluaciones d’impactu na salú de la contaminación del aire. Inclúi modelos atmosféricos col modelu informáticu del Centru Européu de Monitoreo y Evaluación Meteorolóxicu de Sintetización – Oeste (EMEP MSC-W), que tamién utiliza l’Axencia Europea de Mediu Ambiente pa les evaluaciones de la Comisión Europea de los impactos na salú de la contaminación del aire n’Europa. Esti informe nun intenta cuantificar les incidencies de salú reales nin les sos costos reales.
  4. Magar cuatro de les diez empreses más contaminantes tienen les sos principales plantes de carbón n’Alemaña (RWE, EPH, Uniper y Steag), RWE sigui siendo la más dañible pa la salú humana per un ampliu marxe. Trés empreses son de Polonia (PGE, ENEA y ZE PAK), y hai xuna de caúna d’España (Endesa), República Checa (ČEZ) y Bulgaria (Bulgaria Energy Holding). Les compañíes de carbón alemán apoderen la llista porque solo’l país ye responsable del 36 % de tola xeneración d’eletricidá a base de carbón na UE.
  5. Envalórase que solo RWE causó hasta 5.400 millones d’euros en costos de salú acomuñaos en 2016, y hai ocho compañíes de carbón: EPH, PGE, ČEZ, Uniper, Endesa, ENEA, Steag y ZE PAK, con costos de salú de más de Mil millones d’euros cada una. Estos costos nun tán cubiertos poles compañíes, sinón pola sociedá en forma de mayores presupuestos nacionales de salú, costos personales por tratamientu individual y perdes económiques causaes pol amenorgamientu de la productividá.