Con motivu de la xunta del Patronatu del Parque Nacional de los Picos d’Europa que se celebró n’Uviéu, les organizaciones ambientales, ente elles Ecoloxistes n’Aicción,  amuesen la so frontera oposición a la persecución de llobos dientro del parque, y reclamen a les alministraciones competentes el final de los controles de llobos nel Parque Nacional de Picos d’Europa.

Tal como establez la Llei 30/2014, de 3 d’avientu, de Parques Nacionales “los oxetivos de la declaración d’un parque nacional tien por oxetu caltener la integridá de los sos valores naturales y los sos paisaxes y, supeditáu a ello, l’usu y esfrute social a toles persones con independencia de les sos característiques individuales (edá, discapacidá, nivel cultural, etc.) así como la promoción de la sensibilización ambiental de la sociedá, el fomentu de la investigación científica y el desenvolvimientu sostenible de les poblaciones implicaes, en coherencia col caltenimientu de los valores culturales, del patrimoniu inmaterial y de les actividaes y usos tradicionales consustanciales al espaciu.”

Pel so llau la Llei 16/1995 de declaración del Parque Nacional de Picos d’Europa, establez nel so artículu 2 que l’oxetivu del mesmu  ye “Protexer la integridá de los ecosistemes incluyíos dientro de les sos llendes, que constitúin xuna representación significativa de los sistemes naturales y seminaturales asociaos al monte atlánticu na provincia orocantábrica, lo mesmo que de los elementos físicu y biolóxicu que los caractericen.”

Magar la claridá d’estos artículos les alministraciones xestores del Parque Nacional de Picos d’Europa vienen actuando como si’l llobu ibéricu nun formara parte de los ecosistemes incluyíos en dichu espaciu, y vienen autorizando añalmente un cupu de “estracción” de llobos, habiendo matáu dende 1986 hasta l’actualidá 167 llobos de forma llegal. Amás de los llobos mataos, nun númberu non cuantificado de llobos de forma illegal, irregular o furtiva.

Les alministraciones autonómiques vienen xustificando l’autorización d’estos controles nos supuestos daños qu’efectúa’l llobu a la ganadería estensiva, sicasí estes alministraciones nun adoptaron midíes de manexu del ganáu pa llograr la coesistencia ente ganadería y llobos, que la so eficacia ta llargamente demostrada. Ente que los controles demostráronse ineficaces ya inclusive contraproducentes pa evitar los ataques.

Pero lo asocedío nes últimes selmanes en Cantabria yá raspia’l paraxismu, cuando son les alministraciones públiques les mesmes qu’entamen y aurien caceríes multitudinaries de llobos, ensin nenguna tresparencia, nes zones meyor calteníes del Parque Nacional, y con presencia d’especies protexíes. Matando indiscriminadamente cualquier llobu o lloba que se dexa ver, y tollo, namá pa ganar un puñáu de votos.

Otru exemplu de la mala xestión del Parque Nacional de Picos d’Europa ye que’l parque nin dispon d’un Plan Rector d’Usu y Xestión, nin aparentemente hai intención de disponer de dichu preséu de planificación, básicu en cualquier espaciu protexíu. Les trés alministraciones públiques implicaes paecen querer demostrar que nun saben que faer con esti llugar. Nin se coordinen nin se dexen coordinar, en bona midida porque tán declaraes en rebeldía a los fines promulgaos, sinón tán claramente asitiaes en contra del propiu espaciu. Exemplu inequívocu d’ello ye la práctica de la caza, que se caltien cola mesma naturalidá, tanto na aguada cántabra como na castellanu-lleonesa del Parque. Esta cuestión demuestra hasta que puntu nun puede funcionar el Parque como se creó o se caltien.