• Ecoloxistes n’Aición denunció l’impactu medioambiental que l’arramáu del buque Grande América ta provocando n’agües del golfu de Bizkaia, según la escasa efectividá de les actuaciones realizaes hasta’l momentu para contenelo y apangalo.
  • La mariña cantábrica ta en grave riesgu por contaminación, que podría afectar tantu a los mesmos ecosistemes marítimos  y mariñes, como a les actividaes económiques que sofiten les comunidaes locales: la pesca, la recueya d’algues, el marisquéu, el turismu y les actividaes de recréu. 

L’arramáu del buque Grande América anguaño atópase tremáu por dellos puntos al norte de la mariña cantábrica. Ta asitiáu a un centenar de milles de tierra, con una ocupación d’unos 50 kilómetros cuadraos según les últimes informaciones. Ecoloxistes n’Aicción esixó a les autoridaes que, daes les característiques, dimensiones y proximidá d’esti arramáu, tómese la iniciativa para consideralo col grau máximu de gravedá y condición más elevada de peligrosidá.

Para la organización ecoloxista ta xustificada l’activación del Plan de Respuesta na so fase de “Emerxencia”,  “Situación 2”, cuidao que pueden vese afectaes delles comunidaes autónomes y zones especialmente vulnerables, lo qu’implicaría l’activación del Plan Marítimu Nacional de respuesta énte la contaminación del mediu marín. Igualmente deberíense activar los planes local y territorial, y poro, el Plan Estatal de Protección de la Ribera del Mar.

El cargueru Grande América tresportaba nel momentu del accidente más de 2.000 tonelaes de fuel para la so propulsión, unos 2.100 vehículos y cientos de tonelaes d’ácidu clorhídrico, aceites, resines, fungicidas, ya infinidá de sustances tóxiques y peligroses de diversa naturaleza.

Bona parte d’esti cargamentu foi arramáu cola quema del buque y otra parte atopase a más de 4.000 metros de profundad, espuestu a la emisión continuada de sustances tóxiques sobre’l mediu acuáticu, como yá asocedió en naufraxos similares producíos en dómines recién.

Les consecuencies d’estos arramaos son de mala cuantificación, pero d’una repercusión significativa sobre los ecosistemes marinos y mariñes, más allá de les catastrófiques consecuencies previsibles sobre la avifauna marina.

Por esti motivu, Ecoloxistes n’Aición solicitó que s’empecipie l’apertura d’espedientes d’investigación y sanción que dexen, per un sitiu, empecipiar los trámites para apangar los impactos provocaos pol arramáu y, per otru llau, depurar les responsabilidaes que se deriven d’este esti sucesu, tanto dende’l puntu de vista ambiental como económicu.

Para Eneko Aierbe, coordinador de la área Medio Marín d’Ecoloxistes n’Aición, “ye imprescindible restituyir los valores ambientales y estabilidá económica de los sectores amestaos al mediu marín, al so estáu anterior”.

Asina mesmu, la organización ecoloxista solicitó que se derive toa responsabilidá a la empresa armadora, o entidá aseguradora que la sofita, para que estes asuman tol costu económicu causáu polos llabores de vixilancia, contención, prevención y actuación derivaos del incidente. “Entá ye más si tenemos en cuenta que se publicó información según la cual el buque presentaría delles faltes ya infracciones en materia d’estinción de quemes nes últimes inspecciones que se-y realizaren”, aprofió Aierbe.

Ecoloxistes n’Aicción tamién esixó que s’informe a la ciudadanía de forma veraz y completa y que se facilite l’accesu a la información rellacionada con esti sucesu a toles persones comenenciudes, de la forma más axilosa posible. Una información que dexe aportar a los datos referentes a la evolución del arramáu, cartografía de zones vulnerables, asina comoa a otres cuestiones que se consideren relevantes.

Ecoloxistes n’Aición lleva décades denunciando’l modelu de producción y consumu que sofita les economíes actuales, cuidao que más allá de ser un modelu fondamente inxustu, toma riesgos inasumibles con consecuencies de les que munches vegaes nun se fai cargu. Estos riesgos tradúcense en situaciones como l’actual, con un impactu notable sobre los ecosistemes y l’economía local.

Eneko Aierbe: “Ye bien probable que la marea negra llegue a la mariña yá sía la mariña cantábrica o la francesa.  En cual quier casu volverán repitise les imaxes que toles persones tenemos guardaes na retina con arramaos que tiñen de negru la mariña y los sos habitantes. Tenemos de actuar pa poder torgarlo”.