- Cachucho o palometa roja (Beryx decadactylus) especie que da su nombre al denominado Banco de Le Danois Cachucho o rei (Beryx decadactylus) especie que da'l so nome al denomáu Bancu de Le Danois
El Conseyu de Ministros aprobó, a propuesta de los ministerios de Mediu Ambiente; Esteriores y de Cooperación; Defensa; Fomentu; Educación y Ciencia; Industria, Turismu y Comerciu, y Agricultura, Pesca y Alimentación, un alcuerdu pel que s'adopten midíes pa la proteición de la fastera marina de «El Cachucho», ente elles entamar los trámites pa declarala Fastera Marina Protexida.
El Cachucho (Banco Le Danois), ye un monte submarín allugáu a unes 36 milles marines de la costa asturiana, onde s'atopó una escomanada biodiversidá con cuasi seiscientes especies rexistraes, dos d'elles nueves pa la ciencia.
Ye un ecosistema mui delicáu y tamién mui importante pa la reproducción d'especies pesqueres comerciales como la bacalada, la barbada, el pixín y la cabra d'altura. Nos sos fondos esisten roncheles de coral d'agues fríes, ocles y ramos. Les comunidaes biolóxices que más rescamplen son amestaos d'ocles de profundidá, roncheles de corales d'agues fríes, comunidaes de montes submarinos y comunidaes de pennátules y de megafauna escavadora.
La zona cumple, d'esta miente, los criterios qu'afita la Directiva comunitaria de 1992 sobre conservación de los hábitats naturales y de la flora y fauna silvestres pa la so designación como Llugar d'Importancia Comunitaria (LLIC) na Rede Natura 2000, y tamién los criterios pa incluyila na Rede de Fasteres Marines Protexíes del Conveniu OSPAR.
Per otro lláu, dende'l puntu de vista pesqueru, el caladeru namás lu usen unos pocos barcos procedentes los más d'ellos de los puertos asturianos, que salen en busca de cigala, pixín, barbada y otres especies comerciales. La proteición de «El Cachucho» tendrá un impactu reducíu nel sector pesqueru, mientres que l'efectu reserva deriváu d'esta proteición va ser perbonu pa la recuperación del caladeru y de los recursos pesqueros esistentes al so rodiu.
La Lley del Patrimoniu Natural y de la Biodiversidá, aprobada nel 2007, incorpora al ordenamientu xurídicu español la posibilidá de crear Fasteres Marines Protexíes. Poro, l'alcuerdu que güei aprobó'l Conseyu de Ministros da pasu pa que'l Ministeriu de Mediu Ambiente entame los trámites, en collaboración colos Ministerios coproponentes y les Comunidaes Autónomes afectaes, pa la declaración de la zona de «El Cachucho» como Fastera Marina Protexida, y tamién la ellaboración del correspondiente Plan d'Ordenación de los Recursos Naturales y del Plan de Xestión.
Tamién se va proponer a la Comisión Europea qu'incluya esta zona na Llista de Llugares d'Importancia Comunitaria dientro de la Rede Natura 2000, y a la Secretaría Executiva del Conveniu OSPAR la so inclusión na Rede OSPAR de Fasteres Marines Protexies.
Tamién se va pidir a la Comisión Europea que tome midies de xestión pesquera na fastera de «El Cachucho» y que ponga un réximen de proteición preventiva consistente nes siguientes midies:
- Nun se concederán nuevos permisos d'investigación d'hidrocarburos, nin se renovarán los actualmente esistentes na zona de «El Cachucho».
- Prohibir cualesquier actividá minera d'esploración o estraición, sacante aquelles rellacionaes con permisos d'investigación en vigor.
- Prohibir les maniobres militares con españíos subacuáticos o la utilización de sonares de baxa frecuencia.
El Ministeriu d'Agricultura, Pesca y Alimentación, en collaboración col Ministeriu de Mediu Ambiente, ellaborará'l correspondiente Plan de Xestión Pesquera que s'integrará nel Plan de Xestión de la zona.
Amás, el Ministeriu de Mediu Ambiente, en collaboración colos demás Ministerios coproponentes, ellaborará un programa de siguimientu y vixilancia de la zona, con estes llínies prioritaries:
- Xeomorfoloxía: Xeofísica ya identificación d'estructures xeolóxiques venceyaes con hábitats bioxénicos vulnerables.
- Circulación: Dinámica de les corrientes submarines demientres periodos llargos.
- Bioloxía: Ampliar los hábitats vulnerables, sobremanera les zones rocoses del cantil del Bancu, les zones de mayor profundidá de la Conca Interna (hasta 1500 m) y el cabeceru del cercano Cañón de Llastres, amás d'un siguimientu de los efectos de les midíes de proteición sobre les comunidaes biolóxiques.
- Pesqueríes:
-
- Identificación del gráu d'impactu d'artes qu'anguañu operen en «El Cachucho» sobre les especies y hábitats vulnerables.
-
- Estimación de rendimientos y descartes de la pesca.
-
- Estudiu de la pesca de palangre de la mamona o barbada d'altura («Phycis blennoides») na zona al sur de la llatitú 44º N y evaluación de la so sostenibilidá.