La Plataforma pola Defensa de Redes, na que ta inxerta Ecoloxistes n'Aición d'Asturies, fai una valoración enforma positiva de les xornaes Onde l'agua ñaz/Donde el agua nace, tanto pol númberu de xente que participó (al rodiu de 300 persones a lo llargo de los cuatro díes) con una presencia significativa de persones del conceyu, pol conteníu de los alderiques y temes trataos, como polos sofitos recibíos dende organizaciones tan significatives como ADENA-WWF o SEO-Birdlife (tuvieron con nós los sos responsables del programa agua a nivel estatal), y la Fundación Nueva Cultura del Agua, que nesta ocasión celebró'l so conceyu añal nesti entornu pa poner de manifiestu que la oposición al banzáu de Caliao ta na so axenda.
Dende Ecoloxistes n'Aición d'Asturies rescamplamos tamién la importancia del compromisu qu'una trentena de profesores de la Universidá d'Uviéu manifestaron al traviés del testu fechu públicu na xornada del vienres y nel que consideren “insostenible la propuesta de construcción d'un nuevu banzáu dientro del Parque Natural de Redes, nel valle del ríu Caliao”.
No que cinca a les conclusiones sacaes de les charres y discutinios celebraos, punxéronse de manifiestu los aspeutos que vienen darréu:
Participación. Amás de lo dicho al entamu, señalamos l'ausencia de representantes de la Confederación Hidrográfica del Norte, de CADASA y de la Conseyería y del Ministeriu de Mediu Ambiente, demostrando otra vuelta que nun tienen nengún enfotu en discutir sobre'l tema, poniendo n'evidencia'l gran déficit democráticu na ellaboración de los nuevos Planes de Cuenca y l'engañu que supón un procesu “de participación activa” –obligáu pola DMA- viciáu pol boicó sistemáticu a tolo que nun seya aplaudir les ocurrencies del Gobiernu Asturianu.
Xestión sostenible del agua y banzáu de Caliao. Rescampla l'ausencia d'información no que tien que ver con datos relevantes: nun hai cifres por separao de suministru y consumu, nin de depuración, nin una valoración fiable de perdes de la rede, nin de calidaes d'agua pa según qué usos, …tampoco nun se facilitó l'estudiu de previsión de demanda que SADEI tenía que tener entregao nel caberu trimestre del añu pasáu… Too ello fai necesario que se desplique en qué se sofita el “interés xeneral” argumentáu pa la construcción del banzáu de Caliao, porque entendemos que la supuesta frañidura de la “curva de garantía” nun puede xustificar el que cásique se quiera duplicar la cantidá d'agua disponible anguaño pal abastecimientu. Ye urxente una auditoría de xestión del agua n'Asturies nos caberos 10 años, pa poder tener elementos que dexen planificar corrixendo errores y polo tanto meyorando la eficiencia ensin necesidá de recurrir a escosar el patrimoniu natural que nos dexa, precisamente, tener agua n'abondanza y d'escelente calidá.
Atención al mediu rural. El Parque de Redes en xeneral y el valle de Caliao en particular necesiten d'una mayor atención al bienestar y a les condiciones de vida de la so xente. Pidimos otra vuelta la igua dafechu de la carretera dende Coballes hasta Caliao y la instalación d'un sistema de depuración d'agues residuales en Caliao, too ello ye inaplazable. Asina mesmo tienen que se desarrollar servicios como telecentros, centros sociales, servicios médicos y de tresporte afayadizos pa la población, cobertura telefónica, y, por supuestu, dar puxu al emplegu na zona pa facilitar l'asentamientu poblacional, poniendo en valir la calidá del entornu, respetándolu al máximu y facilitando la creación de puestos de trabayu que tengan que ver col so mantenimientu.
