Mientres les postreres dos décaes REE y el Gobiernu Asturianu, vienen amenaciándonos col desastre total si nun se constrúin les llínees d'alta tensión, de Lada-Velilla o Soto-Penagos, con unos mensaxes tan catastrofistas, que talmente paecen “Talibanes de la Ecoloxía”, d'esos que tanto critiquen. Dende Ecoloxistes n'Aición d'Asturies lo que podemos reparar ye que, tan urxente nun sería, cuando pasaron venti años, y tou paez funcionar con normalidá, a pesar de que la demanda eléctrica española doblóse, y que la xeneración eléctrica asturiana llegó a amontase hasta nun 50%.
L'usu del catastrofismo, aprovechando los incidentes asocedíos en Girona; rellacionaos coles redes de distribución, y non coles de tresporte; contradiz los mensaxes previos de REE, como los del añu 2004; cuando en xineru, en plenu iviernu, y con niveles altos de producción y consumu, la cayida d'una de les torres de la llínea Soto La Robla, que tuvo inutilizada 20 díes; según REE nun supunxo nengún problema pal sistema, declarando que “De resultes d'esta avería, una parte de la capacidá habitual d'evacuación d'enerxía dende Asturies quedó fora de serviciu, ensin que tuviera nenguna repercusión pal tresporte d'enerxía, una y bones el fluyíu esvióse principalmente, pela otra llínea de 400 kV ente Lada y La Robla”
Nestos momentos esta insistencia xustifícase entá menos, una y bones el problema ye que ye'l modelo enerxéticu propuestu que nun tien en cuenta la realidá, una y bones, en si nes condiciones anteriores, funcionó con normalidá, como pue ser un problema la non instalación d'estes llínees, agora, que la xeneración eléctrica asturiana, n'el 2009, foi la segunda más baxa nestes dos décaes, un 10 % menor que nel añu 1990 y que, siguiendo esi enclín, el mes de xineru de 2010, foi tamién el de menor xeneración, dempués de la de 1996 y un 50 % menor que l'añu anterior, colo que, el saldo de xuru va ser importador, dáu la medría de la demanda.
Dende Ecoloxistes n'Aición d'Asturies siguimos aportunando en plantegar que, gúste-y o non al equipu de gobiernu, esta ye la realidá, que nun se pudi siguir esportando, si tol mundu ye xenerador, y que lo que tamos viendo na situación asturiana, como yera previsible, ye un descensu na participación en xeneración, descensu entá mayor si nos referimos a la xeneración en centrales térmiques, con un descensu del 50% con respectu al añu 2000 y del 24%, con al respective de la de fai 20 años. Situación que nun va variar sustancialmente cola aprobación del “Decretu d'ayudes al carbón”, cuidao que la medría va quedar compensáu col amenorgamientu de la producción de centrales como Lada o Aboño, o lo que ye peor, en centrales de gas.
Quixéramos pidir, a lo último, al señor Hugo Moran, secretariu federal de Mediu Ambiente del PSOE, daqué más de prudencia col tema d'AVE, nun sía que fadie a los directivos del Alministrador d'Infraestructures Ferroviaries (Adif), una y bones, dempués d'años de denuncies de los grupos ecoloxistes, incluyendo a los trenes d'Alta Velocidá na triple A enerxética, xuntu al Avión y al Automóvil; a les que vinieron contestando con informes onde se niega esta situación; agora resulta que vien el señor Morán dándonos la razón y diciendo que l'Alta Velocidá implementa unos consumos d'enerxía de tal valumbu que ye posible que nun síamos capaces de faer funcionar los trenes.