Les organizaciones non gubernamentales [1], tantu Medioambientales como de la Salú, tán fondamente decepcionaes pola decisión de la Comisión Europea de nun proponer nueves restricciones sobre'l mercuriu hasta que se firme un nuevu un tratáu internacional, decisión tomada na apocayá revisada Estratexa de la Unión Europea (UE) sobre'l Mercuriu.

«La versión revisada de la estratexa de la UE sobre'l mercuriu ye prácticamente un pulgu vacíu», dixo Elena Lymberidi-Settimo, Coordinadora del Proyectu del EEB, Mercuriu Cero. «En llugar d'amosar un lideralgu global con exemplos europeos y marcando el ritmu, la Comisión decidió tomar el vagón de cola. La contaminación con mercuriu va siguir y va siguir siendo un riesgu pa la salú humana, los ecosistemes y la vida selvaxe».

Hasta agora la UE desempeñó un papel líder a nivel mundial pa la erradicación del mercuriu, cola Estratexa del 2005 como buque insignia de la so política. Esta Estratexa foi fundamental pa consiguir el sofitu de les Naciones Xuníes, qu'alcordó desenvolver un tratáu legalmente venceyante pa 2013.

L'actitú europea d'esperar y ver qué pasa va ralentizar la evolución escontra un tratáu eficaz y esixente, porque munchos países sofitense na actitú de la UE pa tomar decisiones. En llugar d'amosar el camín a siguir, la estratexa revisada dexa'l control del mercuriu a les lleis esistentes, unes lleis que demostraron ser insuficientes sobremanera tocantes a emisiones de mercuriu al aire.

La UE nun quixo tomar la decisión d'esaniciar l'usu de mercuriu na industria del cloru, qu'inda cunta con 30 plantes que siguen utilizando mercuriu a pesar d'esisten alternatives ensin mercuriu dende la década de los 80. L'informe d'Ecoloxistes n'Acción “Inmisiones de mercuriu na industria clorocáustica 2010” incide nel descontrol imperante nesti sector.

Ecoloxistes n'Acción tamién destaca'l fechu de que, teniendo en cuenta que l'oxetivu de la estratexa ye «amenorgar los niveles de mercuriu nel mediu ambiente y l'esposición humana», siquier deberíense poner en marcha remanes qu'amenorguen les emisiones de les centrales térmiques de carbón, que son de fechu les mayores fontes d'emisión de mercuriu al aire n'Europa y el mundu.

Munches instalaciones siguen emitiendo más de 20 tonelaes de mercuriu cada añu, polo que la nueva Directiva sobre emisiones industriales (IED) tendría d'incluyir llendes d'emisión venceyantes. Desgraciadamente, la IED nun va sirvir pa tomar midíes contra les emisiones peligroses, una y bones les midíes concretes de prevención de la contaminación dependen de la Comisión europea.

Los Estaos miembros y les ONG pidieron una fecha d'eliminación total del usu de mercuriu na industria del cloru, nes axuntadures dentales y nes piles de botón, y l'ampliación de prohibir la esportación de productos que contienen mercuriu que tean prohibíos na UE.

Notas

[1] European Environmental Bureau .- Oficina Europea de Mediu Ambiente (EEB, nes sos sigles n'inglés) -la mayor federación d'organizaciones ecoloxistes d'Europa.

Health Care Without Harm Europe.- Salú ensin Daño Europa (HCWH-Europe), ye la caña europea d'una coalición internacional d'hospitales, profesionales médicos y organizaciones del mediu ambiente que trabayen pa tresformar el sector de la salú, ensin comprometer la seguridá del paciente, y de cuenta que sía ecológicamente sostenible.

Health and Environment Alliance (HEAL).- Alianza pa la Salú y el Mediu Ambiente de l'Alianza (HEAL) ye una organización internacional non gubernamental qu'aboga protección del mediu ambiente como un mediu p'ameyorar la salú y el bienestar.