Abandónase’l procesu de discutiniu del PH de Cuenca

Toles versiones d’esti artículu: [Asturianu] [Castellano]

La Directiva Marcu de l’Agua repite’l principiu de participación y ente otres coses diz que: “Pa garantizar la participación del públicu xeneral, incluyíos los usuarios, nel establecimientu y l’actualización de los planes hidrolóxicos de cuenca, ye necesariu facilitar información fayadiza de les midíes previstes y de los progresos realizaos na so aplicación, con cuenta de que’l públicu xeneral pueda apurrir la so contribución primero que s’adopten les decisiones finales sobre les midíes necesaries”

Ecoloxistes n’Aición d’Asturies formamos parte d’esa ciudadanía comenenciuda y la participación nesti procesu tien que facese nel escasu tiempu llibre que nos dexen les nueses ocupaciones y, amás, les nueses xeres llaborales nun tán venceyaes cola tema que nos ocupa, y disponer del asesoramientu y la formación técnica pa poder entender los rellabicos de munches de les midíes que puedan plantegase esíxenos un sobreesfuerzo que nin se facilita nin se sofita nin se valora. A pesar de solicitalo nunca llogremos ayuda dalguna per parte de l’Alministración (nin autonómica, nin estatal nin de Confederación) y entá tamos esperando respuestes a los allegamientos presentaos en caúna de les fases realizaes.

Amás, el procesu de participación llindóse a les siguientes convocatoria:

  1. Dos plenarios a la fin de los cualos dexósenos falar escasos minutos.
  2. Una única xunta en redol a una mesa de trabayu sobre l’Esquema de Temes Importantes na que podríamos dicir foi la única que s’averó’ a lo que pudiéramos considerar un procesu de participación real
  3. Una xunta de trabayu’ (de too l’ámbitu de la Confederación Hidrográfica del Norte: Euskadi, Cantabria, Castiella y Llión, Asturies, Galicia) sobre la recuperación de costos de los servicios de l’agua na que se nos facilitó una información totalmente deficiente sobre la tema (axuntamos ensin conocer los datos reales de demanda) nuna clara actitú de boicó per parte de les empreses xestores de l’agua que se negaron a apurrir la información necesaria pa poder saber de qué tábamos falando, ente otros despropósitos.

Esti procesu participativu” nun gocia de nenguna credibilidá social, ente otres coses porque nun ye conocíu pola sociedá y les Alministraciones nin fomentaron nin nos sofitaron nel espardimientu del propiu procesu nin de los sos conteníos, y tampoco supieron nin queríu implicar a los medios de comunicación nel alderique.

Dende Ecoloxistes n’Aición d’Asturies cremos que cuatro reuniones en cuatro año apurriendo la documentación en precariu y con tiempos muertos’ d’un añu ensin nenguna noticia, y devasaos tolos plazos, fai qu’agora lleguen les prieses por cerrar un procesu “de participación” que na práctica real nunca se llegó a abrir y onde los modelos de bones práctiques enxamás interesaron.

Llegamos, finalmente, a la última xunta na que se nos convoca pal llunes 21 de Marzu, únviennos la documentación, como siempres, bien tarde, (el día 16 de Marzu) no que paez ser una burlla escontra les organizaciones y movimientos sociales que tienen d’estudiar, aldericar y consensuar primeramente ente los sos miembros los conteníos y les postures a tomar, pa treslladales darréu al que tuviera de ser un grupu de trabayu intersectorial de cuenca”. Nestes circunstancies difícilmente vamos poder apurrir la nuesa contribución pa una meyor toma de decisiones.

Por tou ello ye polo que nos negamos a siguir representando’l papel de comparses nesti asuntu, que, magar empecipiamos con ilusión ya interés, l’Alministración haber convertíu nun meru procesu burocráticu ensin utilidá dalguna, un foru más onde soltar discursos vacíos y aparentar que se fai, dando safazu una vegada más a l’apertura democrática en tomar de decisiones que dende tolos ámbitos apregónase tantu como se refuga. La participación nun se resuelve con un decretu, nin consiste en tres discurso con Power Point incluyíu y dalgún minutu por si daquién tien daqué que dicir. La participación rique básicamente de dos condiciones ineludibles: el compromisu de les Alministraciones y la dotación de recursos a les organizaciones ciudadanes implicaes. Dambes inesistentes en tol procesu.

Si en dalgún momentu deciden abrir realmente’l procesu participativu, dende Ecoloxistes n’Aición d’Asturies vamos tar con sumu gustu en disposición pa implicanos. Entrín y non consideramos el nuesu tiempu bien pervalible como para nun perdelo n’afatar polítiques que nos ignoren y usalo sicasí pa esmazcarar onde correspuenda la pantomima que supunxo a nivel xeneral la Planificación Hidrolóxica supuestamente al amparu de la DMA y sobremanera la que nos concierne, la referida a la Demarcación del Cantábricu Occidental.




Visites coneutáes: 677