Denuncien al Gobiernu Asturianu ante la UE

Toles versiones d’esti artículu: [Asturianu] [Castellano]

Ecoloxistes n’Aición d’Asturies denuncia ante la Unión Europea al Gobiernu Asturianu por incumplimientu de la directiva d’información y participación pública.

El Conveniu de Aarhus regula l’accesu a la información, participación pública en tomar de decisiones y accesu a la xusticia en materia de mediu ambiente. El públicu gocia asina del derechu a acceder a la información ambiental que les autoridaes públiques tienen, lo que contribúi a cumplir el mandatu constitucional de garantizar el derechu de toos a esfrutar d’un mediu ambiente fayadizo pal desenvolvimientu de la persona y a cumplir cola obligación de toos de caltenelo. Esti derechu ta reguláu na lexislación española pola Llei 27/2006, de 18 de xunetu, pola que se regulen los derechos d’accesu a la información, de participación pública y d’accesu a la xusticia en materia de mediu ambiente.

En Asturies, el preséu de reflexón y participación pa empobinar tomar de decisiones nes cuestiones d’ámbitu rexonal, con incidencia directa sobre la sostenibilidá ambiental, y como foru d’analís de la situación ambiental d’Asturies, ye’l Observatoriu de la Sostenibilidá del Principáu d’Asturies, órganu colexáu de calter consultivu, creáu pol Gobiernu del Principáu d’Asturies dientro de les acciones previstes n’Alcuerdu pa la Competitividá, l’Empléu y el Bienestar d’Asturies 2008-2011.

El Plenu constituyóse en septiembre de 2008, y axuntóse darréu en diverses ocasiones, amás, nel senu del Observatoriu constituyéronse diverses Ponencies Técniques (Indicadores de Sostenibilidá, Mediu Ambiente y Empresa y, en 2013 Mediu Ambiente y Enerxía) y el Decretu pol que se regula la so estructura, composición y réxime de funcionamientu, y que nun foi modificáu por nenguna de les reformes realizaes polos socesivos gobiernos, especifica claramente que se debe axuntar en sesión ordinaria semestralmente, amás de poder axuntase con calter estraordinariu. A pesar d’ello, la última xunta plenaria del mesmu foi’l día 8 d’abril de 2013, fai más un añu, incumpliendo claramente les normes aprobaes.

Esti incumplimientu de les directives y normes nacionales torguen participar en tomar de decisiones tan importantes como’l cumplimientu del Conseyu de Gobiernu del Principáu d’Asturies de la proposición non de llei, aprobada pol Plenu de la Xunta Xeneral del Principáu d’Asturies sobre la oposición a la estracción de gas por resquiebra hidráulica, y faen inútiles los alcuerdos tomaos na primer xunta de la Ponencia Técnica de Mediu Ambiente y Enerxía, sobre la Resquiebra Hidráulica, na que s’aprobó, como previsión d’actividaes, la realización d’un documentu que sería sometíu a alderique pol Plenu del Observatoriu a finales de 2013, Plenu que, como indiquemos, nun se celebró.

Ante esta situación, y cuidao que dende’l Conseyu de Gobiernu; al que repitimos por escritu la solicitú del cumplimientu de les normes del Observatoriu; nun recibimos respuesta dalguna, ye polo que dimos en denuncialo ante la Comisión de la Comunidaes Europees. .




Visites coneutáes: 373