Según Ecoloxistes n'Aición d'Asturies, la enerxía eólico nun ye incompatible colas Reserves de la Biosfera, pela contra, tien, xunto col restu de les enerxíes renovables, un papel cabezaleru nel desendolcu de los sos oxetivos p'algamar un desarrollu sostenible; contribuyendo, amás, nos oxetivos de Desarrollu del Mileniu.

Dende Ecoloxistes n'Aición d'Asturies valoramos positivamente la declaración, dende la Mesa del Conseyu Internacional de Coordinación del Programa sobre l'home y la Biosfera (MAB), de la Comarca Ríu Eo, Ozcos y Tierres de Burón, xunto con otros 22 nuevos espacios; como parte de la Rede Mundial de Reserves de la Biosfera.

Esta reserva, que xunta cuatro zones de diferente paisaxe: l'estuariu y la bocana'l Ríu Eo, la costa cantábrica, los canales fluviales y el Cordal Cantábricu, entama a formar parte de les árees conocíes como reserves de la biosfera. Estes árees, qu'abarquen tanto ecosistemes terrestres como marítimos, rurales como urbanos, tán escoyíes como árees xeográfiques representatives de los diferentes entornos del planeta y formen parte del proyeutu “Home y Biosfera”. Esti proyeutu tien como oxetivu amestar la mentalidá y l'usu de los recursos naturales, dibuxando'l conceutu de desarrollu sostenible d'anguaño.

Les reserves de la biosfera tán reconocíes internacionalmente, pero, por desgracia y como yá criticamos delles veces, nun tán curiaes nin protexíes por nengún tratáu internacional, lo que permitió facer nelles tou tipu de proyeutos, en munchos casos incompatibles dafechu cola so función principal, ye dicir, la conservación y proteición de la biodiversidá. Esti fechu permitió a la Conseyera de Mediu Ambiente aselar a toles persones interesaes nes ventayes “promocionales” qu'esta declaración tien, pero esmolecíes poles posibles torgues a les que pudieren ser sometíes.

Ye curioso que namás les posibles torgues a la instalación de parques eólicos son les que tán bien vistes por dellos sectores. Poro, dende Ecoloxistes n'Aición d'Asturies queremos dicir que, como recueye'l programa Home y Biosfera, esta declaración que quier el desarrollu económicu y humanu de les zones incorporando los principios de desarrollu sostenible nes polítiques y programes nacionales; sofitando d'esti mou los Oxetivos del Desarrollu del Mileniu (ODM), sobremanera l'oxetivu 7 amás de nun ser compatible cola instalación de parques eólicos xuega pela contra, xunto col restu de les enerxíes renovables, un papel cabezaleru nel desendolcu de los sos oxetivos, y asina queda afitao nel informe sobre los “Oxetivos de desarrollu del Mileniu de Naciones Xuníes del 2007”, estudiu que, ente la situación actual, onde les enerxíes renovables namás representen un 12 por cientu de la enerxía primario usao (el 6% nel casu la electricidá) y ente un consumu d'enerxía global creciente, plantea la necesidá cada vegada mayor, de progresar nel desarrollu d'estes teunoloxíes d'enerxía llimpio, qu'usen el vientu, el sol, les foles y la enerxía xeométrica, ensin escaecer la gran necesidá de baxar el consumu de los que tan penriba de la media mundial.

L'informe reconoz que ye probable que sigamos necesitando de los combustibles fósiles durante un tiempu, pero que de necesitar una aición internacional mui firme p'acelerar la transición hacia les fontes d'enerxía más llimpies y eficaces, ente les que la enerxía eólica tien de tener un papel cabezaleru.